接客的學問（二）

佢cut線係咩意思？佢放飛機？定佢見到我個樣之後彈鐘？唔會掛⋯⋯佢匿埋咗喺邊度？你有冇見到鬼鬼鼠鼠嘅人啊？ 。 。 。 好啦好啦，唔好意思，其實冇呢個人，我同你講下笑。我諗你而家可能好無奈，嬲咗都好正常，或者你會諗點解會有咁無聊嘅人。 明啊，我明㗎，因為呢啲事發生咗喺我身上太多次。俾人放飛機其實已經冇咩大不了，客人會專登喺遠處觀察我嘅樣，睇吓有冇伏，先決定現不現身。有時候outcall去遠啲嘅地區，我都識得要求對方俾咗幾百蚊訂金保障自己先，但唔係個個客都肯咁做。遇到啲唔係有心要幫襯嘅仲煩，一來一回嘥時間之餘，有時候因為約呢啲Booking推咗其他客，冇埋原本嘅生意。更加唔洗提嗰啲打電話嚟問三問四又唔幫襯嘅人，覆訊息都係要時間同心機。 經歷多咗，我都學識咗點樣提防呢啲人，慢慢就少咗呢種情況。雖然呢啲都係小事，但如果考慮到我一個人做生意，仲要應付呢啲咁無理嘅騷擾，真係幾攰。不過今日有你陪我一齊等，一齊經歷，我感覺又好似冇咁差。 好啦，我地一起去婆婆咖啡屋去搵阿偉，差唔多夠鐘啦！